పొద్దు

శోధకుడు

పొద్దున్నే లేసినాడు కాదరయ్య అంటూ పొడుచుకొచ్చిందో బ్లాగు 2006 జూలైలో. ‘తెల్లారేసరికి భట్టుపల్లెలో ఆయనో ఘంటసాల, ఆయన పేరు కాదరయ్య‘ ఐనట్టుగా, ఆ బ్లాగు పొడిచీ పొడవగానే ఆయన ప్రసిద్ధుడూ, ప్రసిద్ధులకు ఆత్మీయుడూ అయిపోయాడు. “చాలా బాగా రాశారు”, “మనసున ఉన్నదున్నట్టు అక్షరాలుగా పరచ గలగటం మీకు చేతయ్యింది..”, “గమ్ముగా ఉండాది!” అంటూ తమ ఆనందాన్ని వెలిబుచ్చారు తోటి బ్లాగర్లు. “ఏం కాదరయ్యా బాగుండా..?” అంటూ ఆత్మీయంగా పలకరించారు, ఎప్పటి నుండో ఎరిగున్నవారిలాగా. “నాకు తప్ప అందరికీ తెలిసినట్టుందే ఈయనెవరో” అని సీనియర్లు ఆశ్చర్యపడిపోయారు కూడా.

యర్రపురెడ్డి రామనాధరెడ్డి అనే రానారె అనే బ్లాగరి పుట్టాడు.

యర్రపురెడ్డి రామనాధరెడ్డి అనే బ్లాగు చిన్ననాటి జ్ఞాపకాల మాల. ఒక్కో పువ్వునూ ఏరి కూర్చుతూ సొంపైన దండను తయారు చేస్తున్నాడు, రానారె. జ్ఞాపకాలు అందరికీ ఉంటాయి.. చక్కగా ఓ గాథలా చెప్పగలిగే సత్తా అందరికీ ఉండదు. ఈ విద్యలో రానారె ప్రవీణుడు. మనసుకు హత్తుకుపోయేలా చెప్పగలడు. రాయలసీమ మాండలికంలో రానారె శైలి, చెయ్యితిరిగిన కథకులకేమీ తీసిపోదు.

పరకాయ ప్రవేశం చేసి రాస్తాడు గామోసు.. పదేళ్ళ పిల్లవాడి భావాలు చాలా సహజంగా ఉండి మనసును హత్తుకుంటాయి. తనను తాను శోధించుకుంటూ రాస్తున్నట్టనిపిస్తుందీ బ్లాగు. నాలుగు నల్ల లారీలు, ఆరు యర్ర లారీలు అనే జాబులో ఓ పిల్లవాడి (తానే!) మనసును మనముందు పరుస్తాడు. బళ్ళో ఉన్న పిల్లవాడికి తోటలోకొచ్చిన లారీని చూడాలని ఉత్సాహం, ఎప్పుడు బడి ఒదుల్తారా లారీని చూద్దామా అని వాడి తహతహ. ‘యట్టనోగట్ట మజ్జాన్నమాయ’ -రెండు మాటల్లో చెప్పేస్తాడు వాడి ఆరాటాన్ని. ‘ఎదురొమ్ము నిండా గాలిబీల్చి ముంచేతులు నడుంపైన బెట్టుకొంటి.’, ‘నేనెవుర్నో తెలిసినిట్టు లేద”నుకోని, “మేం ఈ తోటగల్లోళ్లం.” అంటి.’ – ఇలాంటి వాక్యాలు చదువుతూ ఉంటే పిల్లవాడు మనముందే నిలబడినట్టు ఉంటుంది. ఈ బ్లాగులోని మేటి జాబు ఇది

దీపావళి వెలుగుల పండగ అయినప్పటికీ, పండగ పేరిట ప్రజలు చేసే మోతలు కొందరికి ఎంత ఇబ్బంది కలిగిస్తుందో ఈ జాబులో రాసాడు. “వుండుండి వచ్చే టపాకాయల శబ్దానికి నిదురలోనే వులిక్కిపడే చిన్న పిల్లాణ్ణి చూస్తే అవి పేల్చినవాణ్ణి కోసి ఆ మాంసంతో ఊరగాయ పెట్టాలనిపిస్తుంది నాకు.” అంటాడు.

వేదికనలంకరించిన పెద్దలు ఈ బ్లాగులోని మంచి జాబుల్లో ఒకటి. బడిలో ప్రతిభా ప్రదర్శనలో బహుమతులందుకుని వచ్చిన తనకు, సూక్తి రూపంలో తన తండ్రి ఇచ్చిన బహుమానం గురించి నెమరు వేసుకుంటాడీ జాబులో. సహజంగానే బ్లాగరులు రానారె తండ్రిని అభినందించారు. రానారెపై తండ్రి ప్రభావాన్ని సూచించే జాబుల్లో ఇది ఒకటి.

బూతుమాటలకు బ్లాగుపీఠం ఎక్కించాలన్నా రానారెకు సాధ్యమే! బ్లాగరులు బహుథా మెచ్చిన జాబుల్లో ఇది ఒకటి.

రానారెకు మనిషి అంటూ మరో బ్లాగు కూడా ఉంది. వివిధ విషయాల గురించి రాస్తూ ఉంటాడిందులో. సమాజం, రాజకీయాలు, తాత్వికత, సినిమాలు, ఇతర కళలు, చెనిక్కాయల్లాంటి పద్యాలూ, జీడిపప్పుల్లాంటి 30 మాత్రల గూగులమ్మ పదాలు మొదలైన వాటన్నిటికీ ఈ బ్లాగులో చోటుంది.

రానారె బ్లాగులకు కొన్ని ప్రత్యేకతలున్నాయి. తన జాబుల్లో కొన్ని పదాలకు అర్థం తెలియడం కోసం నిఘంటువుల లింకులు పెడుతూ ఉంటాడు. తన మాండలికంలో రాసే మాటల అర్థాలు తెలియని పాఠకుల కోసం పత్రికా భాషలో సమానార్థకాలను కూడా ఇస్తూంటాడు.

రానారె బ్లాగుల్లో హాస్యానికీ చోటుంది. కడుపుబ్బ నవ్వించేటంతలా రాయడు గానీ, మృదువుగా, గిలిగింతలు పెట్టేలా, చమత్కారాలతో రాస్తూ ఉంటాడు. చిన్నతనంలో సావాసగాళ్ళతో కలిసి చేసిన చిలిపి పనుల గురించి రాసిన ఈ జాబు చూడండి. బిగ్ బెండ్‌లో వాతావరణం మునుపెన్నడు లేనంత ఇబ్బందికరంగా ఎందుకుందంటే తాను అడుగుపెట్టడమే దానికి కారణమని జొకేసుకుంటాడు తనమీదే!

చక్కటి భాషతో, భావాలతో ఉండే రానారె బ్లాగులు చదువుతూంటే హాయిగా ఉంటుంది. మనసు తడిపేస్తూ ఉంటాయని పాఠకులన్నారు. ఈ బ్లాగుల్లో ఉండే కొన్ని మాటలు, పదబంధాలు కొత్తగా ఉన్నా, మొదటిసారే విన్నా.., అలా గుర్తుండి పోతాయి –మోజులు మోజులుగా కురిసే వాన లాంటివి.

ఛాయా’గ్రహణమొర్రి’, కంపశయ్య, లాంటి పదప్రయోగాలు రానారె బ్లాగుల్లో ఎన్నో!

అయితే అక్కడక్కడా చురకలూ వేస్తూంటాడు. కడపజిల్లా కరవుసీమ అయినా ఆశ్రితులనెప్పుడూ పోనాడలేదట! ఈ చురక తన మనిషి బ్లాగులోని ట్రావెలాగుడు-1 లోది.

రానారె పాటగాడు కూడా. చిన్నప్పుడు కోటి కోటి పాటలను పాడి, బహు మతులు పోగొట్టి బహుమతులు రాబట్టాడు. రానారెకూ ఆకాశవాణికీ అవినాభావసంబంధమేదో ఉన్నట్టే అనిపిస్తుంది. ఆకాశవాణి ప్రసక్తి రానారె రచనల్లో తరచూ వస్తూంటుంది. తానేకాదు, తన బ్లాగులోని కాకులు కూడా ఆకాశవాణికి శ్రోతలే!

(ప్రస్తుతం సంగీతం నేర్చుకుంటున్నట్లు వినికిడి!) గతంలో తానే స్వయంగా ఓ పద్యాన్ని పాడి, తన బ్లాగులో వినిపించాడు. చిన్నప్పుడు తాను పాడిన కాదరయ్య పాటను వినిపించాలన్న బ్లాగరుల కోరికను మాత్రం తీర్చలేదింతవరకూ!

-కథకుడు, కవీ కూడా. చిన్ననాటనే మొట్టమొదటి కథ రాసి, ఆకాశవాణిలో మొదటి బహుమతి కూడా పొందాడు. ఆయన రాసిన రెండో కథ నత్వం శోచితుమర్హసి ఈమాటలో ప్రచురితమయింది. ఒక ఎద్దు స్వగతాన్ని, ఆపై దాని “ఆత్మ”గతాన్ని కథగా మార్చి చక్కటి కథనంతో నడిపించాడీ కథను. పక్షులు కూడా రానారె బ్లాగులో పాత్రలే. ఈ జాబులో కాకులతో మనుషులకు బుద్ధి చెప్పిస్తాడు. ఈ మాటలను చూడండి.. “ఒక్క నిముషం కాకులన్నీ అవ్వ చెప్పిన మాటను నెమరు వేసుకొన్నాయి. సులభంగా ఆ మాటలను వాటి రక్తంలోకి జీర్ణించుకొన్నాయి. మనుషులకు అంత జీర్ణశక్తి లేదు పాపం.”

తెలుగు నుడికారంపై ఆయన పొద్దులో రాసిన రెండు వ్యాసాలు (మొదటిది, రెండోది) పెద్దల ప్రశంసలు పొందాయి. భాష విషయంలో రానారె బహు పట్టుదల మనిషి. “రాసాడు”, “రాశాడు” అనే మాటలవిషయంలో తెలుగుబ్లాగు గుంపులో మంచి ఆసక్తికరమైన చర్చ నడిపించాడు. అచ్చు తప్పుల్ని క్షమిస్తాడు గానీ, అచ్చోసిన తప్పుల్ని చూసి తట్టుకోలేడు రానారె! ఈతబర్రల పూజకి ఎనకాడ్డు ఈ జాబు చూడండి మీకే తెలుస్తుంది. అలాగే ఇదీ చూడండి. దీపావళిని దివాలి అని అనరాదని చెబుతూ.. “దీపావళి అనలేని దక్షిణాది వాడంటే నాకు కంపరం.” అని రాస్తాడు.

బ్లాగులు రాసినా, పద్యాలల్లినా, కథల్జెప్పినా.. బేసిగ్గా రానారె భాషా ప్రియుడు. రుచులూరే భాష కోసమే ఆయన రచనలను చదవొచ్చు. ‘ఓహో, అంతర్జాలంలోనూ సరుకున్నవా రున్నట్టున్నారే’ అని పెద్దలు ఇటుకేసి దృష్టి సారించేలా చెయ్యగలిగే బ్లాగరుల్లో రానారె ఒకడు. ఆయన రచనలు అచ్చులోనూ వచ్చి, తగు గుర్తింపు లభించాలని కోరుకుంటున్నాం.

-పొద్దు

-పొద్దు

2008 జనవరిలో కింది విశేషాలు తెలుగు బ్లాగరులను ప్రధానంగా ఆకట్టుకున్నాయి.

1. రెండో ఎస్సార్సీకి అనుకూలంగా వీరప్ప మొయిలీ చేసిన ప్రకటన
2. భారత ఆస్ట్రేలియా క్రికెట్ యుద్ధం
3. సంక్రాంతి పండగ
4. నటుడు రాజశేఖర్ పై చిరంజీవి అభిమానుల దాడి

జనవరి 29 నాటి జాబులు ప్రధానంగా రాజశేఖర్ పై చిరంజీవి అభిమానుల దాడిపైనే కేంద్రీకృతమయ్యాయి. దాడిని ఖండిస్తూ కొన్ని, రాజశేఖర్ ప్రకటనలపై చురకేస్తూ కొన్ని వచ్చాయి. శోధన, గుండె చప్పుడు, డల్లాస్ తెలుగు వెన్నెల, నెటిజెన్, ఫన్‌కౌంటర్, తేటగీతి, చదువరి మొదలైన బ్లాగుల్లో స్పందనలు వచ్చాయి. కొందరు రాజశేఖర్ వ్యాఖ్యలను విమర్శించగా, కొందరు అభిమానుల చర్యను ఖండించారు. కొందరు చిరంజీవిని వ్యాఖ్యలను విమర్శించారు. శోధన, గుండె చప్పుడు అభిమానుల చర్యను ఖండిస్తూ, హితబోధ చేసారు. చిరంజీవి వ్యాఖ్యను చదువరి, డల్లాస్ తెలుగు వెన్నెల, ఒరెమూనా, నెటిజెన్ లు ఖండించారు. డల్లాస్ తెలుగు వెన్నెల చురుకైన వ్యాఖ్యలతో అందరినీ ఖండించింది.

సామాజిక అంశాలు
లక్ష రూపాయల కారు టాటా నానో ఈ నెల తెలుగు బ్లాగర్లు పట్టించుకున్న సామాజిక అంశాల్లో ఒకటి. కడలి తరగ, ఈ కారును, అది సాధించదలచిన ప్రయోజనాన్ని విమర్శనాత్మకంగా చూసారు. ఆ జాబుకు మంచి వ్యాఖ్యలు కూడా వచ్చాయి. ఈ విషయంపై మరో మంచి జాబు, తెలుగు వెబ్ ఛానల్ లో వచ్చింది.

సంక్రాంతి:

పెద్ద పండగ సంక్రాంతి పండగ సందర్భంగా బ్లాగరులు ఉత్సాహంగా జాబులు రాసారు. మచ్చుకు కొన్ని:

• ఊకదంపుడు – రైతు-సంక్రాంతి పురుషుడు -రాజకీయ నాయకుడు పేరుతో రాసిన జాబులో రైతుకు మేలు జరగాలని కోరుకుంటూ ఒక సీస పద్యాన్ని రాసారు.
• జ్యోతి – మాయింట సంక్రాంతి సంబరాలులో పట్నవాసపు సంక్రాంతి విశేషాలను రాసారు.
• సిరిసిరిమువ్వ – మకర సంక్రాంతి శుభాకాంక్షలులో తన చిన్ననాటి సంక్రాంతి సంగతులు రాసి పాఠకులకు తమ అనుభూతులను గుర్తుకు తెచ్చారు.
• నిశ్శబ్ద మాలిక – సంక్రాంతిపై ఓ చిరు కవిత రాసారు.
• తెలుగు బుడుగు – ఎక్కడుందీ సంక్రాంతి లక్ష్మి అంటూ తన చిన్ననాటి సంక్రాంతి రోజులను గుర్తు చేసుకుంటూ నేటి సంక్రాంతి అలా లేదే అని బాధపడ్డారీ బ్లాగరి.

హాస్యం:
పెళ్ళి సంబంధాల వెబ్‌సైట్లలో వచ్చే ప్రకటనల మీద వికటకవి రాసిన జాబులు ఈనెల మంచి సందడి చేసాయి. రెండు భాగాలుగా రాసిన ఈ జాబుల్లో పెళ్ళికొడుకులు ఇచ్చిన హాస్యయుతమైన ప్రకటనలను ఏరి కూర్చి, అంతే హాస్య స్ఫోరకమైన తన వ్యాఖ్యానాలతో అందించారు. ఆ జాబులకు వచ్చిన వ్యాఖ్యలను బట్టి చూస్తే అవి రెండూ మంచి ప్రజాదరణ పొందినట్టే. అ జాబుల్లో ఇది మొదటిది, ఇది రెండోది.

తేటగీతి బ్లాగులో చక్కటి హాస్యంతో కూడిన బ్లాగు సీరియల్ ను అందించారు. జనవరి నెలలో “అమెరికాలో ఆపసోపాలు” పేరిట 16 భాగాల సీరియల్ ను ప్రచురించారు. జనవరి 12 న మొదలుపెట్టి తరువాతి భాగాలకు వెనుక తేదీలు వేసుకుంటూ (కాలంలో వెనక్కి) రాసుకుంటూ పోయారు. పాఠకులకు వెనక తేదీలకు వెళ్ళి చదువుకుంటూ వచ్చే పని లేకుండా చేసే ప్రయత్నమై ఉండవచ్చు. కొన్ని సంవత్సరాల కిందట రాసి పెట్టుకున్న ఆ జాబులు చక్కని నవ్వుల్ని పంచాయి.

క్షుర ఖర్మ పేరుతో రెండురెళ్ళ ఆరు రాసిన జాబు ఆ బ్లాగు లోని గత జాబుల స్థాయిలో లేకపోయినప్పటికీ నవ్వులు బాగానే కురిపించింది.

క్రికెట్:
భారత ఆస్ట్రేలియాల మధ్య జరుగుతున్న క్రికెట్టు పోటీల గురించి బ్లాగరులు బాగానే స్పందించారు. వాటిలో కొన్ని:

• శోధన
• బ్లాగాడిస్తా. ఈయనే తన మరో జాబులో అంపైరు బక్నర్‌నో బ్లాగాటాడించారు.
• తెలుగు వెబ్ ఛానల్
• తాడిమేటి రాజారావు తన చిన్ననాటి క్రికెట్టు అనుభవాలతో ఓ జాబు రాసారు.

సాహిత్యం:
కలం కలలు: చక్కని భాషతో, ముఖ్యంగా పుస్తకాల సమీక్షలు రాసే ఈ బ్లాగు 2007 చివరిలో బ్లాగు లోకంలోకి దూసుకొచ్చింది. తన గత జాబుకు సాలభంజికలు నాగరాజు రాసిన ఒక వ్యాఖ్యకు స్పందనగా, బ్లాగరి ఫణీంద్ర రాసిన ఈ జాబు ఈ నెల ఆకట్టుకున్న జాబుల్లో ఒకటి.

2007 లో తాము చదివిన పుస్తకాల గురించి జాబులు వచ్చాయి. వాటిలో ఒకటి –
సౌమ్య రైట్స్: పుస్తక సమీక్షలకు ఈ బ్లాగు ప్రసిద్ధి. 2007 లో బ్లాగరి చదివిన 18 పుస్తకాల గురించి ప్రస్తావిస్తూ ఈ జాబు సాగింది. సౌమ్య తనకు నచ్చినవే కాక, నచ్చని పుస్తకాల గురించి -అవి ఎంత ప్రఖ్యాతి గాంచినవైనా – రాస్తూ ఉంటారు. వాటిలో ఈసారి వేయిపడగలు, అనుక్షణికం ఉన్నాయి.

దుప్పల రవి తాను చదివిన పుస్తకాల గురించి తన బ్లాగులో రాస్తారు. ఈనెల కొయ్యగుర్రం, రాధికా సాంత్వనముల గురించి రాసారు.

రానారెసవ్వడిలో తన గూగులమ్మపదాల తరువాతి గుచ్ఛాన్ని చూడవచ్చు. బ్లాగరి తన స్నేహితులతో చేసిన నాలుగు రోజుల విహారయాత్రానుభవాల ఆరు టపాలు కూడా (ఒకటి తప్ప) ఈ నెల్లోనే వచ్చాయి. ట్రావెలాగుల కోవలోకి వచ్చే ఈ జాబులకు ట్రావెలాగుడు అనే పేరు పెట్టాడు. ఈ ట్రావెలాగుడు జాబుల్లో పేరాగ్రాఫులను విడగొట్టిన విధానం కాస్త చిత్రంగా అనిపించింది. బహుశా సాంకేతిక ఇబ్బందులేమో!

రాజకీయాలు:
చిరంజీవి, రాజశేఖర్ వివాదం కాకుండా బ్లాగుల్లో చోటుచేసుకున్న మరో ప్రముఖ రాజకీయ అంశం.. రెండో ఎస్సార్సీ. కాంగ్రెసు పార్టీ రేండో ఎస్సార్సీపై చేసిన ప్రకటనకు తెలుగు బ్లాగుల్లో మిశ్రమ స్పందన కనబడింది. ఎస్సార్సీ గురించీ, సంబంధిత అంశాల గురించీ గుండె చప్పుడులో వరసగా కొన్ని జాబులు వచ్చాయి. ఇవన్నీ కూడా, బ్లాగరి దిల్ (దిలీప్) శైలిలో, చక్కటి విశ్లేషణతో ఉన్నాయి. బాలసుబ్రహ్మణ్యం, తెలుగువీర, నాగరాజు మొదలైనవారు తమ సందర్భోచిత వ్యాఖ్యలతో చర్చను నడిపించారు.

టెక్కు:
దాట్ల శ్రీనివాసరాజు శ్రీ శోధన ప్లగిన్ అనే అందమైన ఓ చిన్ని పరికరాన్ని తయారు చేసారు. ఓ పేజీలో ఉన్న పాఠ్యంలోంచి ఏ పదాన్నైనా ఎంచుకుని డబల్‌నొక్కు నొక్కితే ఆ పదానికి వివిధ నిఘంటువుల్లో అర్థాలు వెతికేందుకు గాను లింకులు వస్తాయి. ఆ లింకులను నొక్కినపుడు, సదరు నిఘంటువు పేజీ వేరే విండోలో తెరుచుకుంటుంది. ఈ పరికరం ప్రజల ఉపయోగార్థం ఇంకా అందుబాటులోకి రాలేదు.

సినిమా:
ఈ నెల బ్లాగుల్లో వేళాకోళానికి పనికొచ్చింది, ఒక్క మగాడు సినిమా. ఈ సినిమాను బ్లాగర్లు నిర్దాక్షిణ్యంగా చీల్చి చెండాడారు. ఈ సినిమాపై వచ్చిన సమీక్షల్లో కొన్ని:
ది ఇన్‌సైడర్
ఒక్కమగాడు – చిత్ర సమీక్ష
అనసూయ సినిమాపై జి.ఎస్.నవీన్ సమీక్ష కూడా జనవరి సినిమా సమీక్షల్లో ఒకటి

విలక్షణం:
తెలుగు బ్లాగులూ వాటి ట్యాగులైనుల గురించి తెలుగు’వాడి’ని ఓ చక్కని జాబు రాసారు. బ్లాగుల గురించిన జాబిది. చాలా పొడవైన వాక్యాలు – సంయుక్త, సంశ్లిష్ట వాక్యాలు – రాయడం ఈ బ్లాగరి ప్రత్యేకత. చిన్నచిన్న వాక్యాలు రాస్తే మరింత చదవవీలుగా ఉంటుందని గమనించాం.

అందమైన బ్లాగులు (బ్లాగురాణులు):
ఈనెల బ్లాగుల్లో కంటికి బాగా నదురుగా అనిపించిన బ్లాగులను ఈ శీర్షికలో పేర్కొంటాము.

• ఒరెమూనా – చావా కిరణ్ తన బ్లాగు ఒరెమూనాను కొత్త మూసతో అలంకరించారు. చూడముచ్చటగా ఉంది బ్లాగు.
• కొత్త బంగారు లోకం – ఈ బ్లాగు శీర్షిక చాలా అందంగా రాసారు. చెయ్యితిరిగిన చిత్రకారుడు గీసినట్టుగా ఉంది. (బ్లాగు పేరు కింద ఉపశీర్షిక మాత్రం ఇంగ్లీషులో రాసారు -గులాబీ కింద ముల్లులా)

ఈనెల బ్లాగులు

1. తలనొప్పా?.. అయితే ఇది వాడండి. మీ నొప్పి తగ్గాక (తగ్గి తీరుతుంది లెండి!), మీ నానమ్మకు కూడా వాడి చూడండి. మా ఈనెల జాబు ఇది.
2. సాలభంజికలు నాగరాజు నేలకొరిగిన ఇంద్రధనస్సు మా ఈ నెల జాబుల్లో రెండోది. సినిమా అభిమానులందరికీ ఈ జాబు పఠనీయం.
3. ఆంధ్ర ప్రదేశ్ ప్రభుత్వ మంత్రి ఒకరు చేసిన వ్యాఖ్యపై డల్లాస్ తెలుగు వెన్నెల వ్యంగ్య ధోరణిలో విసిరిన చెణుకు పాడిగేదెలు-దున్నపోతులు. ఈ నెల జాబుల్లో ఇది మూడోది

అనామకుల గోల
ఈ నెల జాన్ హైడ్ కనుమూరి అనామక వ్యాఖ్యాత బారిన పడ్డారు. కానీ, అయన మాత్రం ఎంతో సంయమనంతో, ఓర్పుతో, హుందాగా ఎదుర్కొన్నారు. కాగా, వింజమూరి విజయకుమార్ తన బ్లాగులో అనామకునికి వాత పెట్టారు. ఆ విశేషం చూడండి.

పాఠకులకు కొన్ని ప్రశ్నలు:

తెలుగు బ్లాగులకు సంబంధించిన కొన్ని అనల్ప ప్రశ్నలిక్కడ ఇస్తున్నాం. సమాధానాలు రాయండి.

1. అత్యధికంగా బ్లాగులు (జాబులు కాదు) కలిగిన బ్లాగరి ఎవరు?
2. అక్షరాల పరిమాణంలో అతిపెద్ద బ్లాగు శీర్షిక కలిగిన బ్లాగు ఏది?