గడిని ఆదరించిన మీకందరికీ ధన్యవాదాలు. వెబ్ లో తొలి తెలుగు గళ్ళనుడికట్టు ప్రయత్నం విజయవంతమైంది. ప్రజాదరణకు మించిన విజయం ఏ ప్రయత్నానికైనా ఏముంటుంది చెప్పండి! పూర్తిగా సరైన సమాధానాలు పంపిన వారు లేకున్నప్పటికీ చాలా దగ్గరగా వచ్చిన వారున్నారు. ప్రశ్నాపత్రం కూర్చిన వారి కంటే ఆ ప్రశ్నలకు సమాధానాలు రాసినవారే ఘటికులన్న విషయాన్ని మేం మరువం. పూర్తి చేసి పంపినవారికీ, దాదాపు పూర్తి చేసినా పంపనివారికి -అందరికీ మా అభినందనలు! ఇకనుండి కొంత వరకు పూర్తి చేసినా పంపగలిగే వీలును కలుగజేస్తున్నాం. ఒక్కొక్కరు ఎన్ని సార్లైనా గడిని పంపవచ్చు. చిట్టచివరగా మాకందిన పరిష్కారాన్ని పరిగణన లోకి తీసుకుంటాం.
గత గడికి పరిష్కారాన్ని, పరిష్కర్తల పేర్లనూ ఇచ్చాం. వాటితోపాటు సమాధానాలకు వివరణ కూడా జతచేసాం. నుడికట్టుతో పరిచయం లేనివారికి, దాన్ని పూరించడం లోని కిటుకులు తెలియని వారికి ఇది ప్రయోజనకరంగా ఉండి, గడి పూరణకై వారిని ప్రేరేపిస్తుంది అని మా నమ్మకం. మొదటి గడి దాటి రెండో గడి లోకి ప్రవేశిస్తూ ఏప్రిల్ నెల గడిని సమర్పిస్తున్నాం.
ఈ నెల మా అతిథి – బ్లాగు విహాయస విహారి, దోనిపర్తి భూపతి విహారి. చక్కటి హాస్యాన్ని రాస్తారాయన. కొలరాడో తెలుగు సంఘంలో సాంస్కృతిక కార్యదర్శిగా చురుకైన పాత్ర పోషిస్తున్నారు. బుడిబుడి అడుగుల నుండి వడివడి నడకల దాకా తన బ్లాగు ప్రస్థానం ఎలా సాగిందో చెబుతున్నారాయన. అలా ప్రతి ఒక్కరూ తాము బ్లాగులెలా మొదలెట్టామో రాసుకుంటూ పోతే తెలుగు బ్లాగు చరిత్ర తయారై పోతుంది.
త్వరలో మరిన్ని కొత్త వ్యాసాలతో వస్తాం. అంతవరకూ అతిథిని పలకరించి గడినో పట్టు పట్టండి. ఈ నెల ఓ కొత్త ప్రయోగం చేసి, మీముందుకు తీసుకు రానున్నాం. ప్రస్తుతం దానిపైనే పని చేస్తున్నాం.