చిన్నితెర చిరునవ్వులు

ఏక కాలంలో ఐదు బ్లాగులు రాస్తున్న జ్యోతిగారు గత అక్టోబరులో మొదలుపెట్టిన వంటల బ్లాగు మూడు నెలలు తిరక్కుండానే వంద టపాలు పూర్తిచేసుకుంది. హాస్యం, వినోదం, వంటలు, పాటలు – ఇలా వివిధ అంశాలపై అమితమైన ఆసక్తిని చూపే జ్యోతిగారు పొద్దు పాఠకుల కోసం ప్రత్యేకంగా నిర్వహిస్తున్న శీర్షిక: సరదా.

జ్యోతిగారి సరదా బ్లాగు http://vjyothi.wordpress.com .

——————-

* టి.వి సీరియల్స్ వల్ల లాభం ?
పగలూ, ప్రతీకారాలు ఎలా తీర్చుకోవాలో నేర్చుకోవడం.
* టి.వి సామెత. కామెంట్ ప్లీజ్?
చూపించేవాడికి చూసేవాడు లోకువ.
* మరీ విడ్డూరమంటే ?
చీ పాడు సీరియల్ ఎంత సాగదీస్తున్నారో అని తిట్టుకుంటూనే మిస్సవకుండా టి.వి సీరియల్ని చూస్తూనే వుండటం.
* ఎక్కడ వేసిన గొంగళి అక్కడే వుండటంకు నేటి పేరడి?
తెలుగు టి.వి సీరియల్
* మూలిగే నక్క మీద తాటిపండు పడటమంటే?
రాన్రాను ప్రేక్షకాదరణ కోల్పోతున్న దూరదర్శన్ ని పే చానల్ గా మార్చాలనుకోవడం.
* ఏరాయితో కొట్టుకున్నా ఒకటే అనడానికి నిదర్శనం?
సినిమాలోని పాటలు సినిమాగా వస్తే, ఆ సినిమా పేర్లతోనే టి.వి సీరియల్స్ రావడం.
* టి.వి సీరియల్స్ వల్ల ప్రయోజనం?
భర్తలు ఆఫీసు నుండి ఎంత లేటుగా వచ్చినా భార్యలని మేల్కొని వుండేటట్లు చేస్తాయి.
* బుల్లి తెరకు సెన్సారు చురక?
చట్టబద్ధమైన హెచ్చరిక టి.వి అతిగా చూడటం కళ్ళకు హానికరం అనే క్యాప్షన్ ఇకపై ప్రతీ చానెల్ వారూ విధిగా వెయ్యాలని నిబంధన పెట్టడం.
* అల్ప సంతోషి?
టి.వి వాళ్ళేసే అడ్వర్టైజుమెంట్ల వల్లయినా నా అర్ధాంగి నాకింత అన్నం వండి పెడుతుందని తృప్తి పడేవాడు.
* టి.వి పిచ్చి బాగా వున్న వ్యక్తి?
మీ దైనందిన కార్యక్రమం ఎలా మొదలౌతుందని అడిగితే భక్తిరంజనితో మొదలై మిడ్ నైట్ మసాలాతో ముగుస్తుంది అంటాడు.
* టి.విలో న్యూస్ రీడర్లు వార్తలు చదవడం పూర్తికాగానే పెన్ను జేబులో ఎందుకు పెట్టుకుంటారు?
మా రాత ఇంతేనని చెప్పడానికి.
* వెండితెరకి బుల్లితెరకి తేడా?
వెండితెర నిండా అంగాంగాల మోహం,బుల్లి తెర నిండా కుట్రల వ్యూహం.

* వట్టిగొడ్డుకు అరుపులెక్కువ అంటే?
బాగోని సినిమాకోసం టి.వి లో పదేపదే ప్రకటనలివ్వడం.