డిసెంబరు ’08 గడి సమాధానాలు

-రానారె

డిసెంబరు గడికి పూరణలను పరిశీలించాం.

ఆదిత్య- అన్నీ సరిగ్గా రాశారు.
కామేశ్వరరావు- అన్నీ సరిగా రాశారు. టైపాటు కాబోలు, ఒక పొరబాటుంది. (41 అడ్డం)
వెన్నెల – అన్నీ సరిగ్గారాశారనే పరిగణిస్తున్నాం. ఒకే ఒక పొరబాటుంది కానీ, తెలిసి చేశారనే అనుకుంటున్నాం. (1నిలువు)
శ్రీలు- రెండు తప్పులతో.
కృష్ణుడు- మూడుతప్పులతో.
ఎల్లంకి భాస్కరనాయుడు – మూడుకన్నా ఎక్కువ తప్పులు.

వీరికి మా కృతజ్ఞతాభినందనలు.
సమాధానాలు

అడ్డం:

1. విజయవిలాసము- అర్జునుని మరోపేరు విజయుడు, అడ్రసుకు తెలుగుపదం విలాసము.
6. పిసినారి- కంప్యూటర్ పి.సి., స్త్రీ నారి
8. తిరి- నులి, మెలి, పురిలకున్న అర్థమే తిరికి కూడా వుంది. తివిరి, తిరిగి లలో దాగుంది తిరి.
9. లన- గరిటె తిప్పిన చక్రవర్తులిద్దరే, ఎందువ-లన?
10.డేతా- విధివక్రిస్తే తాడే పామైకరుస్తుందని సామెత.కృష్ణాతీరంలోని పల్లి తాడేపల్లి. తాడే వక్రిస్తే డేతా.
11.తలివగఅట్టు- ఎచటికిపోతా వీ రాతిరి?అవతలిగట్టుకు – ఇవి శ్రీశ్రీ కవిత అవతలిగట్టులోని పంక్తులు.
16.ధత- దంత్యములకోసం చూడండి http://te.wikipedia.org/wiki/తెలుగు_అక్షరాలు
17.మురి- అరిమురి అంటే తొందరగా, వెంటవెంటనే అని.
18.తాళ్ల- తొలి తెలుగు కవయిత్రి తాళ్లపాక తిమ్మక్క. సుభద్రాపరిణయం ఆమె రచనే.
19.ప్రేమించుకుందాంరా- ఈ ఆధారంలో ఇచ్చిన మూడు పెద్ద పదాలు ఈ సినిమాలోని ఒక పాటలోనివి.
20.వాతాపి- వీనికి కూరుకున్నరూపంలోకి మారే విద్య తెలుసు. తాపీగా అన్న పదం వాతాపిని స్ఫురింపజేయాలి.
21.మగ- నిదపమగరిస నుంచి మగ.
22.సుడి- సుడిలో దూకి ఎదురీదక మునకే సుఖమనుకోవోయ్… కుడియడమైతే పొరబాటులేదోయ్ పాటను విననివారెవరు?
24.లంటప- పరివారమే పటలం. దాన్నే కుడి నుండి యడమకు రాస్తే లంపట. అంటే ఆపద.
25.సుప్రభాతము
27.లుత- తలుగు, తలుపులలో తగులుకొనివున్నవి త లు. అక్రమంగా లు త.
28.తధా- ధాత అంటే బ్రహ్మ అని మాత్రమేకాక, బ్రోచువాడు అనే అర్థముంది. తధాగతుడు అంటే బుద్ధుడు కదా!
29.సిలక- నా పాట నీ నోట పలకాల సిలకా అనే పాటలో వచ్చే డైలాగ్ – యెహె..చి గాదూ..సి..సి..సిలకా… విననివారుంటారా?
30.కాశీయాత్ర- చెళ్లపిళ్లవేంకటశాస్త్రి రచన.
32.రసపిపాసి
36.గడుసరితనము- ఈ శబ్దం స్ఫురింపజేయడానికి సరిత్ప్రవాహములాంటి నడవడి అన్నాను.
37.కలబడి- స్వప్నము అంటే కల, పాఠశాల అంటే బడి.
39.సాసరు
40.శాస్త్రి- సైన్సు అంటే శాస్త్రము.
41.కాగారారం – ఆధారంలోని కారం, గారం, కటకటా వంటి శబ్దాలనుండి కారాగారం. అక్షరాలు తారుమారు.
42.లుఆ- ఆవులు అనడానికి బదులు ఆలు అనవచ్చుకదా, ఆలమంద లాగా. ఆలు తిరిగితే లుఆ.

నిలువు:

1. విప్రుడే – VIP విప్ హోదాకలిగిన బాపనయ్యే.
2. యతి
3. విరి- బోడిగుండుకు విరుల అలంకరణ కష్టంకదా!
4. సలలితరాగసుధారససారం- సలిలమనేపదాన్ని, అమృతము(సుధ)నూ ఆధారంలో కనుగొనవచ్చు. ఈ పాటొక రాగమాలిక.
5. మునవ- తోటను వనము అంటాం. అటునుంచీ మునవ. ఇందులో కొత్తదనం నవ.
7. నాస్తి- న+అస్తి. సంస్కృతంలో ఇదొక తమాషా ప్రయోగమనిపిస్తుంది. లేనిదైయున్నది అని అర్థమేమో.
11.తధదాంమ- మత్+అంధత సాగి మదమెక్కి మదాంధత అయి తిరగబడింది.
12.గమురసుభా- భాసురముగ కరిరాజును బ్రోచిన వాసుదేవుడవు నీవుగదా… శంకరాభరణం చిత్రగీతాలు విన్నారా?
13.అరి- అరి అంటే శతృవు. అరికాలి మంట నెత్తికెక్కడమనేది శబ్దసూచన.
14.చెళ్లపిళ్లవేంకటశాస్త్రి- తిరుపతివేంకటకవులలో ఒకరు. అడ్డం 30 చూడండి.
15.కంచుకోట- ఈ సినిమాలోనిదే -లేదు లేదని యెందుకు నీలో వున్నది దాస్తావు- అనేపాట.
18.తాతా
23.డిత- ఆర్ధ్రతను పైకి చూపితే తడి. సన్నపురెడ్డి వెంకటరామిరెడ్డిగారి కథ. చదివారా?
24.లంతశీ- చలువ అనగా శీతలం పైకెగసింది.
26.ముసిసిము- తామలోతాము నవ్వేనవ్వు ముసిముసినవ్వుకదా, అందుకే ముసిలోళ్లు, ఎదురెదురుగా అన్నాను.
27.లుకారకర- పలురీతులు అనగా రకరకాలు. ఇప్పుడు శీర్షాసనం వేయించండి.
31.త్రగడిగా- స్టాలినిస్టు చరిత్ర — సగము గాడిదగత్ర — చదువుకో ఇతరత్ర — ఓ కూనలమ్మా (ఈ ఆధారంలో ఆరుద్ర పేరు చెబితే సులువైపోతుందని చెప్పలేదు. స్టాలినిస్టు చరిత్ర, సగము, చదువుకో అనే పదాలతో స్ఫురిస్తుందిలెమ్మని …)
33.సరిస- ఇప్పుడు ఆధారం చూడండి మీకే అర్థమౌతుంది.
34.పితరులు- ఇప్పుడు ఆధారం చూడండి మీకే అర్థమౌతుంది.
35.పాన + ము = పానము = ప్రాణము
38.బకా- ‘కాబ’ట్టే అనే శబ్ద సహాయంతో అసురుని ఊ’బకా’యం నుండి మొండెం వేరు చేస్తే బకాసురుడు.
40.శాస్తి— మంత్రిగారి వియ్యంకుడు సినిమాలోని పాట.