రొద

– హెచ్చార్కే
రెండుగా చీలిన
ఒక వేదన
ముట్టడించిన మసక వెన్నెల
చిట్టచివరి విందులో ఇద్దరు
ద్రోహం ద్రోహం
అలలెత్తి అరిచిన దుర్బల సముద్రం!

ఎన్ని ఎండలల్లో
ఇంకెన్ని వెన్నెలల్లో
తగలెట్టుకోగలరు తమను తాము?
ఎవరినెవరు పంపారు శిలువకు?
వారిలో క్షమార్హు
లెవరో చెప్పలేని సందేహ సముద్రం!!

ఒక్కో రాత్రిగా
ఒక్కొక్క పగలుగా
పుట్ట లోంచి ఎటూ వెళ్లలేని పాముల్లా
తమలో తాము వాళ్లెన్నాళ్లు తిరిగినా
నిష్క్రమణ మార్గం
చూపించ లేని నిష్ఫల దుఃఖ సముద్రం!!!