– స్వాతి శ్రీపాద
వెన్నెల జలపాతం ఒడిలో
నగ్నంగా స్నానాలాడుతూ
నర్తిస్తున్న రాత్రి
ఒళ్ళు మరచి పరవశిస్తూ…
క్షణక్షణానికీ మధు పాత్ర నింపుతున్నట్టు
చుక్కలు రాలి వెలుగులను వంపుతుంటే
ఒంటరిగా ఒక్కక్షణం
ఉనికిని కోల్పోయిన ఊహలా
అదృశ్యమయి పోదామనిపిస్తుంది
కలల తివాచీకి రంగులద్ది
సుఖాల పల్లకిలో ఊరేగుదామనిపిస్తుంది
అంతలోనే
మేకప్ చెరిపేసుకున్న నర్తకి మొహంలా
జిడ్డోడుతున్న వాస్తవం
సగం కరగి పోయిన కృత్రిమతా
చేతులు కలుపు కుంటూ
జీవితాన్ని పరిచయం చేస్తాయి
పెదవుల మీద తొణకని స్వప్నం
కనురెప్పలవెనుక నీటి చుక్కై
అదృశ్య సునామీలను అదిమిపెడుతూ
చూపు సారిస్తుంది
————————–
అసంఖ్యాకంగా కవితలు, వందకు పైగా కథలు, ఐదు నవలలు రాసిన స్వాతీ శ్రీపాద అనువాదాల ద్వారా తెలుగు సాహిత్యానికి ప్రపంచస్థాయి గుర్తింపు తెచ్చారు. స్త్రీ ఎల్లప్పుడూ అభ్యుదయపథంలో సాగాలనేదే ఆమె ఆకాంక్ష. తెలుగు, ఆంగ్లాల్లో పోస్ట్ గ్రాడ్యుయేటైన స్వాతీ శ్రీపాద ప్రస్తుతం హైదరాబాద్ కేంద్రీయ విద్యాలయంలో అధ్యాపకురాలుగా, హైదరాబాద్ ఆలిండియా రేడియో ప్యానెల్ అనువాదకురాలిగా పనిచేస్తున్నారు. వార్త దినపత్రికలో వారం వారం చెలి పేజీలో మానస సంచరరే శీర్షిక నిర్వహించారు.
10 Responses to జీవితం