లవర్స్ లాఫింగ్ క్లబ్

(ప్రేమికుల రోజు స్పెషల్)

ఏక కాలంలో ఐదు బ్లాగులు రాస్తున్న జ్యోతిగారు గత అక్టోబరులో మొదలుపెట్టిన వంటల బ్లాగు మూడు నెలలు తిరక్కుండానే వంద టపాలు పూర్తిచేసుకుంది. హాస్యం, వినోదం, వంటలు, పాటలు – ఇలా వివిధ అంశాలపై అమితమైన ఆసక్తిని చూపే జ్యోతిగారు పొద్దు పాఠకుల కోసం ప్రత్యేకంగా నిర్వహిస్తున్న శీర్షిక: సరదా.

జ్యోతిగారి సరదా బ్లాగు http://vjyothi.wordpress.com .

——————–

అనుకోని అదృష్టమంటే?
ప్రపంచసుందరికి రాసిన ప్రేమలేఖకి జవాబు రావటం.

ప్రియురాలు అందంగా కనవడేదెప్పుడు?
ఇల్లాలు గుర్తొచ్చినప్పుడు.

ప్రేమకి, పెళ్ళికి తేడా?
మొదటిది ఇష్టమైన కూరతో సుష్టుగా భోజనం చేయడం, రెండవది ఏదో ఒక కూరతో సరిపెట్టుకుని అయిష్టంగా భోంచేయడం.

ప్రియురాలు ఉలిక్కిపడేది ఎప్పుడు?
‘అర్జంట్‌గా నాకు వెయ్యి రూపాయలు వుంటే ఇవ్వు డియర్, పెళ్ళికి ఇవ్వవలసిన కట్నంలో తగ్గించేస్తాను’ అని ప్రియుడు అన్నప్పుడు.

ప్రియుడు అదిరిపోయేదేప్పుడు?
ప్రియురాలు ప్రియుడితో ‘నీకు 3 చోట్ల ముద్దు పెట్టాలని కోరికగా ఉంది.’ అనంటే ప్రియుడు సంతోషంతో ‘త్వరగా చెప్పు, ఎక్కడెక్కడ?’ అనడిగితే ప్రియురాలు ముద్దుగా గారాలు పోతూ ‘ఊటీ,తాజ్‌మహల్, కాశ్మీర్ దగ్గర’ అన్నప్పుడు.

ప్రేమలో పడటం అంటే?
నాలికకి ఉప్పుకూ,చక్కెరకూ తేడా తెలియకపోవడం.

యువకుడైన బ్రహ్మచారికి, ముసలివాడైన బ్రహ్మచారికి గల తేడా?
యువకుడైన బ్రహ్మచారి తన గర్ల్‌ఫ్రెండ్ వచ్చే ముందు తన గదిని నీట్‌గా సర్దితే, ముసలివాడైన బ్రహ్మచారి తన గది సర్దడానికే గర్ల్‌ఫ్రెండ్‌ని పిలుస్తాడు.

ఇంటికి దీపం ఇల్లాలు, మరి ప్రియురాలు?
ఎమర్జెన్సీలైట్.

-వలబోజు జ్యోతి (http://vjyothi.wordpress.com)