పద్యకవిసమ్మేళనంలో పాల్గొనని పద్యసుమాలు

వికృతి ఉగాది పద్యకవిసమ్మేళనంలో సమయాభావం వలన సమర్పించలేకపోయినవి, సంబంధిత కవులు ఆ సమ్మేళనంలో పాల్గొనలేకపోవడం చేత సమర్పించలేకపోయినవీ అయిన కొన్ని మంచి పద్యాలను కొత్తపాళీ గారు ఎంచి పంపించారు. వాటిని ఇక్కడ సమర్పిస్తున్నాం.
————————–

దత్తపది: మాలిక, తూలిక, పోలిక, చాలిక -ఉత్పలమాల నాలుగు పాదాల్లోనూ తొలిపదాలుగా ఉపయోగిస్తూ

సందీప్:

మాలిక కూర్చి నీ సిగన మాన్యులు పెట్టెనె! నేటి దేశముల్
తూలిక సాటి నీ చరితతో సరిచూచిన! కల్పవృక్షమే
పోలిక తోచుచుండు! చినబోతివె, నిందలు నీకు ధారుణిన్
చాలిక భారతంబ! పరచాలిక నీ ఘనతెల్లదిక్కులన్!

సమస్య: ఒకటి ఒకటి కూడి ఒకటెయగును

రాఘవ:

సంగమమునఁ జూడఁ జాహ్నవి కాలిన్ది
రెండు నదులు గలియు రీతి ద్వితయ
బంధువర్గములు వివాహవ్యవస్థలో
నొకటి యొకటిఁ గూడి యొకటె యగును

రవి (బ్లాగాడిస్తా):

ఆలుమగలుఁ గలసి అనురాగమౌ రీతి
మిత్రులిర్వురు నొక మైత్రి లీల (ప్రాసయతి)
భ్రాతలిర్వురిలను భ్రాతమైత్రి సరణి
ఒకటి ఒకటిఁ గూడి ఒకటెయగును.

సందీప్:

సొంతమేలు కొఱకు యెంతసేపు వెదకు
చదువుకున్నవారి చదువదేల?
స్వార్థభరితహృదయసాహస్రమైనను
ఒకటి ఒకటి కూడి ఒకటేయగును

చదువరి:

జీవునందె గలవు జీవాత్మ పరమాత్మ
శంకరార్యు లిటుల సలిపె బోధ
ఆత్మ లొకటి యగుచు అద్వైతమెట్లౌనొ
ఒకటి ఒకటి కూడి ఒకటెయగును

దత్తపది: మాసు, బాసు, కింగు, కేడీ – మన్మథుని గురించి

రాఘవ:

మాసుతుఁడు సురభిమిత్రుఁడు
భాసురమౌ చిలుకతేటివాఁడు సెలఁగి గ్రా
వాసుతకు శివునికిం గూ
ర్మ్యాసక్తులఁ గూర్చి తా మరణమునకె డిగెన్

ఆత్రేయ:

జగముల సెబాసు బడయగ
నగధరు కింగురి విడిచెన నంగుడు అకటా
మిగల రమాసుతుడు మసిగ
వగచెను దిక్కేడి యనిరతి వగలుడి కొరకై

సనత్ శ్రీపతి:

మా సుమ బాణముల్ హరుని మానసమందున ప్రేమ నింపగా,
భాసురమైనతేజమిటు భాసిలె స్కంధుగ ! క్రౌంచ తారకా
ద్యసురారీ ! ఒనరంగజేసితిని గాదా ధాత్రికిన్ గూర్మి ! నే
డిసుమంతైనను లేడు నా యశముకే ఢీ చెప్పు వాడెవ్వడున్ !

నచకి:

ఆసలు వీడబోకు, జయమాతని జెందుట తథ్యమేను లే-
మా, సుమబాణుడే హరుని మానసమందున ప్రేమ పెంచు, నం-
బాసుదతీ మనంబదియె ఫాలశశాంకుని గోరగా చిరా-
కే సెలవంచు నా శివునికిం గుశలంబది కల్గజేయగా
రాసకళావిలాసుడయి రాజిలు తుల్యుడు వానికేడిరా!

సమస్య: రాణ్మహేంద్రవరమ్ము జేరెను రత్నగర్భుని జెంతకున్

సనత్ శ్రీపతి:

మన్మనంబున ప్రేమ భావన మంతరించెడి వేళ ! మా
కున్ముదంబున కైత లిచ్చుచు, కోటి రత్నపు వీణయే,
వన్మినిట్టు సహింపబోమను వాదనల్ తెరదింపుచున్
రాణ్మహేంద్రవరమ్ము చేరెను, రత్నగర్భుని చెంతకున్

(కోటి రతనాల వీణ = తెలంగాణ. రత్నగర్భ = రాయలసీమ)

సభలో ప్రస్తావించిన అంశాలు కాక ప్రశ్నోత్తరాలలో జరిగిన మరికొన్ని ఆసక్తికరమైన పూరణలు

సమస్య – కుందేళులు రెండువచ్చి కుచములు గరచెన్

శ్యాం పుల్లెల:

అందముగ మంచుపడగా
కొందరు స్త్రీ ప్రతిమ చేసి కుచమూలమునన్
పొందికన ఉంచ కారట్స్
కుందేళులు రెండువచ్చి కుచములు గరచెన్

రాఘవ:

ఇందీవరంబు కుచమై
యిందుని బింబము శశమయి యింపుగఁ సరసీ
బృందద్వయమునఁ దేలగఁ
గుందేళులు రెండు వచ్చి కుచములఁ గఱచెన్

బ్లాగాడిస్తా రవి:

అందాల శశక మొక్కటి
చందురు వోలె. ప్రసవించి శాబము లీనెన్.
సందెకది గూడు రా, చిరు
కుందేళులు రెండు వచ్చి కుచముల గరిచెన్

సనత్ శ్రీపతి:

సుందరముగ సుందరినీ
కుందేళ్లను జెక్కి నిల్పె కూరలపై నీ
సందడిలో ! గమనింపగ
కుందేళులు రెండు వచ్చి కుచముల గరచెన్

ఫణి ప్రసన్న:

పెందాళే జూకెళ్ళితి
అందాళులు తీర్చిదిద్ద అరుదగు పొదనో
సుందర కన్యగ యచ్చట
కుందేళులు రెండు వచ్చి కుచముల కరిచెన్.

సమస్య – రాట్నము చేతబట్టుకొని రాక్షస కృత్యము చేసినాడహో

శ్యాం పుల్లెల:

పట్నపు పిల్లెరుగనిది, పాపడు బంతిని ఎట్లు వేయునో,
కట్నము చాలదంచు తన కాంతను కొట్టుట ఏమి కృత్యమో,
చట్నిని రొట్టెతో తినగ చక్కగ అయ్యరు రుబ్బి కమ్మగా,
రాట్నము – చేతబట్టుకొని – రాక్షస కృత్యము – చేసినాడహో

(క్రమాలంకారము – మొదటి మూడు పాదాల్లోని వరుస ప్రశ్నలకు చివరి సమస్య పాదంలో సమాధానాలు)

రవీంద్ర లంకా:

అట్నము లెట్లు గట్టెదము? ఆపదలొచ్చెనె యాంధ్రదేశమున్!
కట్నము కోట్ల లెక్కలుగ గట్టితి మీ తొడగొట్టు నేతకున్,
పట్నములమ్ము పొట్లముల పాలకుడేగద రావణుండొహో,
రాట్నము చేత బట్టుకొని రాక్షస కృత్యము చేసినాడహో

రాఘవ:

రాట్నముఁ జేతఁ బట్టికొని “రాక్షసకృత్యముఁ జేసినా డహో
అట్నము లాక్రమించి కపటాదరముల్ ప్రకటించి వృత్తులన్
పట్నములందుఁ దెల్లదొర పల్లియలందునఁ రూపు మాపె నీ
రాట్నమె సాక్షి” యంచు ప్రజలన్ నడిపించెను గాంధి నేతయై

దత్తపది: బీరు, విస్కీ, రమ్ము, జిన్ను – గాంధీ మహాత్ముడు

సందీప్:
సీ:-

వివిధదేశములేగి విస్కీవినోదాల, మాయకు లొంగక మాన్యుడయ్యె!
బీరుపోకుండగ వీరుల రాజ్యము, “సత్యమేవజయతే” శంఖమూది
రమ్ము! తెల్లదొరల రాక్షసాన్ని తరిమికొడదాము మనమంత కూడబడుచు
మతభేదమేలయ్య? మనమంత వొక్కటే! జిన్నాను పిలువండి జిన్నుడంచు”!

ఆ:-

అనుచు ప్రజలఁగూడి శాంతినే అసి చేసి
బంధనముల చీల్చి బాధ తీర్చి
చక్కనైన బాట జాతిపిత మలచె!
పొరుగుదేశములును పొగిడె మెచ్చి!

విశ్వామిత్ర:

సహనంబీరుచినొంద మిత్రుడయి శస్త్రమ్మై యలంకారమున్
మహరాజుల్ వడకేటిమొండితనమే మైనంటబీరమ్ముగన్
మహిపైసాత్వికమార్గమున్ విడని కర్మాచారయాజిన్ స్వజా
తిహితైషిన్ కొలుతున్, ప్రజన్ గవిసికీర్తింతేను గాంధీయమున్

This entry was posted in కవిత్వం and tagged , . Bookmark the permalink.

3 Responses to పద్యకవిసమ్మేళనంలో పాల్గొనని పద్యసుమాలు

  1. రవి says:

    “కుందేళులు రెండు వచ్చి కుచముల కరిచెన్.”

    ఈ సమస్య – ఆకాశవాణి అష్టావధానంలో శ్రీమాన్ నల్లాన్ చక్రవర్తుల కృష్ణమాచార్యుల వారు ఇలా పూరించారుట.

    కొందలము గొలుపు గ్రీష్మము
    నందారిద్ర్యము చేత పతిని నట్టింటన్ కూ
    డందైము చేత ముదిత
    కుం దేళులు రెండు వచ్చి కుచముల గరిచెన్.

  2. Sowmya V.B. says:

    బాగున్నాయండీ. ఇలాగే మరిన్ని మంచి చర్చలు పెట్టి, వాటిని ఇక్కడ ప్రచురించగలరు.

  3. శ్రీ says:

    రవిగారూ, పద్యంలో ఏదో మజా వున్నట్టుంది. “కూడందైము చేత” అంటే ఏమిటో చెప్పగలరు.

Comments are closed.